COTABATO — Nagsimula ngayong Linggo ang isang buwang pag-aayuno ng mga Muslim.

• Bangsamoro mufti declares April 3 as start of Ramadan

Sa kaniyang mensahe para sa paggunita sa pag-uumpisa ng Ramadan, nanawagan si Bangsamoro interim chief minister Ahod Balawag Ebrahim sa buong rehiyon na palakasin ang pagmamahalan bilang Muslim community.

Nagpaalala rin siya, lalo't patuloy pa rin ang banta ng COVID-19.

"Mainam na obserbahan pa rin ang minimum health protocols sa mga aktibidad na isasagawa sa susunod na 4 na linggo," ani Ebrahim.

Dahil nataon ang buwan ng Ramadan sa buwan ng pangangampanya sa local at national elections, hiniling ni Ebrahim na sana’y manaig ang kapayapaan, papapasensiya, at pag-intindi sa bawat isa.

"Huwag natin hayaan na makasira sa ating pag-aayuno ang hindi pagkakapareho ng ating mga pananaw sa usapin ng pulitika," aniya.

Sa buong buwan ng Ramadan, ipinagbabawal ang pagkain, inumin, pakikipagtalik at iba pang nakasisira sa pag-aayuno.

Isinasagawa sa buong buwan ng Ramadan ang Taraweeh prayer. Ang salitang Taraweeh ay hango sa salitang Arabic na ang ibig sabihin ay pagpapahinga o makapagpahinga. Isa itong espesyal na pag-aalay ng dasal ng ummah o komunidad.

• Muslim groups sa Davao City, nagtipon para paghandaan ang Ramadan

— Ulat ni Lerio Bompat