MAYNILA - Humihingi ng tulong ang anak ng isang mag-asawang kabilang sa mga sugatan nang mahulog sa bangin ang sinasakyan silang jeep sa Torrijos, Marinduque nitong Sabado.

Ang mga magulang ni Ryan Regis ay kabilang sa 28 na sugatan sa aksidente. Tatlo naman ang kumpirmadong namatay.

• Jeep na galing kasalan nahulog sa bangin; 3 patay, 28 sugatan

Sa isang Facebook post, sinabi ni Regis na malubha ang lagay ng kaniyang mga magulang.

Dahil gipit sila sa pera, ginamit niya ang social media upang makahingi ng tulong, na agad tinugunan ng ilang netizens upang makaagapay sa hospital bill.

"Hindi ko po kaya na mawala Magulang ko. Mahal na mahal ko po Magulang ko hindi ko kaya na nakikita ko nakahiga sila sa isang kama na hindi naman dapat na higaan nila. ang sakit lang isipin bakit nangyare ito," sabi ni Regis.

Galing sa kasalan ang jeep na sinasakyan ng mga magulang ni Regis bago ito mahulog sa isang bangin.

Kabilang sa mga nasawi ang groom na si Engr. Allan Roldan, isang 10 anyos na bata, at isang lolo, ayon sa hepe ng Torrijos police na si Lt. Lily Nicolas.

Base sa imbestigasyon, nawalan umano ng preno ang jeep, ayon sa drayber na si Roderick Regardo na hawak na ng mga pulis.

Samantala, sa mga nais magpadala ng tulong para sa kaniyang mga magulang, sinabi ni Regis na maaring magpadala sa kaniyang Gcash account na 09380671183.

- ulat ni Reiniel Pawid, ABS-CBN News

RELATED VIDEO

Watch more in iWantv or TFC.tv