MAYNILA — Nagpasalamat ang broadcast journalist na si Doris Bigornia ngayong Lunes sa mga mananaliksik na nagpangalan sa isang bagong tuklas na flowering plant hango mula sa kanya.

Matatandaang isang bagong tuklas na species ng halamang namumulaklak sa Silangang Mindanao ang ipinangalan kay Doris Bigornia.

Isa ito sa 2 uri ng halamang nadiskubre sa naturang lugar, ayon sa bagong pag-aaral tungkol sa Begonia. Pinangalanan ang naturang halaman na Begonia dorisiae.

Ang epithet na dorisiae ay isang "tribute" kay Bigornia, na ang pangalan ay naging impormal pero kapaki-pakinabang na monicker ng genus na Begonia, lalong-lalo na sa mga lokal na komunidad, ayon sa mga awtor ng pag-aaral.

"Seriously ako'y nagpapasalamat at ako ay tuwang-tuwa pati ang aking pamilya dahil matagal na rin sa totoo lang maraming nagkakamali noon Begonia ang nilalagay na apilyedo ko," sabi ni Bigornia.

"Kaya pag gano'n sinasabi ko, 'Ay hindi ako 'yan kasi Begonia.' Ngayon puwede ko nang sabihin, 'Ako 'yan, Begonia dorisiae.'"

'Begonia dorisiae': New flowering plant species named after Doris Bigornia

Bukod sa pagpapasalamat, may nakatutuwa ring reaksiyon si Bigornia sa balitang ito.

"Hinihintay ko ‘yung tropeo ko," pabirong sabi ng mamamahayag. "O kung walang tropeo, ‘yung kanilang pabuya."

"Gusto ko din habang may seremonya ay papalibutan ako ng sandamakmak na Begonia," aniya habang tumatawa.

Biro pa ni Bigornia, "bagay na bagay" sa kanya ang bagong tuklas na species ng halaman na natuklasan sa bayan ng Caraga sa Davao Oriental dahil sa "napaka-demure" na hitsura ng maliliit na bulaklak ng halaman.

Dagdag ni Bigornia tungkol sa pagpapangalan sa kanya sa halaman: "Para sa akin hindi more on bragging [kundi] 'yung magiging humble ka na wow, meron pa lang ganyan."