MAYNILA – Tradisyon na ng marami ang mamasyal tuwing Pasko sa makasaysayang Luneta Park sa Maynila para magsalu-salo sa paligid ng magarbong Christmas display at konsyerto.

Ngayong taon, puwede pa ring ipagpatuloy ang naturang tradisyon. Pero marami ang aasahang pagbabago sa ilalim ng mga panuntunan para makaiwas sa COVID-19.

Ayon kay Reina Jara, chief administrative officer ng National Parks Development Committee (NPDC), limitado sa 2,000 ang puwedeng makapasok sa parke ngayong taon.

“Kahit may pandemya, tuloy na tuloy pa rin ang Pasko,” ani Jara.

• Picnic still not allowed but kids can stroll in Luneta
• Open parks better alternative as children still disallowed in malls, says health expert

Umabot aniya sa 30,000 ang namasyal sa Luneta Park noong Dec. 24, 2019; at, 77,000 naman noong Dec. 25, 2019.

Nasa kabuuang 200,000 naman ang crowd estimate sa pagsalubong ng Bagong Taon noong Dec. 31, 2019 at mismong araw ng Bagong Taon noong Jan. 1, 2020.

Para sa taong ito, magbubukas lang ang parke ng alas-5 hanggang alas-9 ng umaga, at alas-4 ng hapon hanggang alas-9 ng gabi.

“Mananatili na ang parke ay isang lugar kung saan ang mga tao ay magkakaroon ng pagkakataon na makapag-ikot, pagkakataon na ma-enjoy nila ang kalikasan, at pagkakataong makalimot sa kanilang problema,” sabi ni Jara.

May mga itinalagang entrada sa park para masala ang mga tao para matiyak na na-sanitize ang kamay, hindi mataas ang body temperature, at nakapagsulat sa contact tracing form.

Sa loob ng Luneta Park, may mga markings kung saan puwedeng maglakad sa partikular na direksyon.

May lugar lang din kung saan puwedeng tumayo ang magpapakuha ng litrato at saan pupuwesto ang photographer.

Bawal magtinda sa loob ng parke para maiwasan ang kumpulan.

Isa pa sa malaking pagbabago ay bawal magpasok ng inumin at pagkain kaya hindi rin puwede ang nakagawiang pagsasalo-salo o picnic.

BALIKAN:

Watch more in iWantv or TFC.tv

“Dahil mayroon pang pandemya, inaasahan na ang mga bibista sa ating parke ay panandalian lamang na iikot upang masigurado na masunod ang physical distancing,” ani Jara.

Sulit pa rin naman ang pamamasyal sa Luneta dahil sa magagandang Christmas display, partikular ang higanteng Christmas tree at dancing fountain.

May concert pa rin, pero online na lang na mapapanood sa Facebook page ng NPDC.

Kanselado na rin ang inaabangang taunang fireworks display.