Nakisaya sa mga naiibang paligsahan ang mga taga-Tabaco City, Albay para sa pagdiriwang ng kanilang taunang Tabak Festival.

Unang sumalang ang ang ilang magigiting na ginoo sa pagalingang magkudkod ng niyog.

Sa loob ng isang minuto, dapat mabitak na ng mga kalahok ang niyog. Pero hindi riyan nagtatapos ang contest dahil dapat din nilang kudkurin ang mga nabiyak na niyog.

Dalawang minuto lang ang ibinigay sa contestants para magpaparamihan sa makukudkod na niyog.

Sunod niyan, nagparamihan naman ang contestants sa mga makukuhang gata sa nakudkod na niyog.

Kung may pabilisan sa pagkudkod ng niyog ang kalalakihan, di naman nagpahuli ang kababaihan sa kanilang tagisan sa pagbubukas ng pili.

Ang siste sa labanan, dapat hindi mawarak ang mismong pili nut kapag binuksan ang 'shell' nito.

Wagi sa kumpetisyon ang 63 anyos na si Leticia Avila na nagtatrabaho sa isang pagawaan ng mga produktong may sangkap na pili nuts.

Kuwento ni Lola Leticia, matinding kontrol sa tabak o panghiwa ang sekreto sa kaniyang 'perfect' na pagbubukas ng pili nut.

Ipinagdiwang ang Tabak Festival hanggang nitong Linggo, Hunyo 25. -- Ulat ni Jose Carretero, ABS-CBN News