Watch more in iWantv or TFC.tv

Ano-ano ang mga dahilan kung bakit nawawalan ng gana ang isang empleyado sa kaniyang trabaho?

Ayon sa corporate trainer na si Shiela Viesca, maaaring hindi akma sa pinasok na trabaho ang empleyado kaya ito nawawalan ng interes o gana.

"If you are happy in your personal life, if you are in a workplace where you don't fit, hindi mo match o wala kang competency and wala kang opportunity to grow, then magiging miserable ka," ani Viesca sa "Sakto" ng DZMM noong Lunes.

Ayon pa kay Viesca, may pagkakataon din na maaaring "hindi compatible" ang empleyado at employer.

"Kung tama naman 'yung individual at mali 'yung manager, hindi sapat 'yung leadership, then no matter how fit that person is for the organization may possibility na demotivated siya," aniya.

Sa kabila nito ay iginiit ni Viesca na may solusyon pa para sa mga ganitong problema.

Aniya, mainam na umiwas sa mga sitwasyon na makasasama sa trabaho, gaya ng pagkakalat ng tsismis o labis na pagrereklamo.

"Communicate, baka naman nagko-complain ka lang din baka walang nangyayari," ani Viesca, na isa ring communications specialist.

Kung may problema sa immediate superior ay dapat ideretso umano ito sa kaniya, ayon kay Viesca.

Pero sa pagkakataong hindi na kayang masikmura ang ugali ng immediate superior ay dapat dumiretso na sa department head o sa opisyal na mas mataas dito.

Mahalaga rin ang lumahok sa mga training na ibinibigay ng human resources (HR) office ng kompanya para mapalawak ang kakayahan at posibleng maremedyohan ang mga dating hindi kayang gawin.

"Paunlarin mo ang pagkatao mo at buksan mo ang opportunities. Kaya may mga training programs 'yung mga companies," aniya.