Pumanaw na ang isa pang haligi ng Original Pilipino Music na si Hajji Alejandro sa edad na 70. Sa isang pahayag, kinumpirma ng pamilya ang pamamaalam ni Hajji at humiling na mabigyan sila ng pagkakataong makapagluksa nang pribado. 

Dahil sa kanyang karisma, binansagang 'Kilabot ng mga Kolehiyala' ang singer na nagsimula sa industriya bilang miyembro ng Circus Band, kung saan nagsimula rin ang karera ng iba pang artists na sina Basil Valdez, Pat Castillo, Tillie Moreno at Jacqui Magno. 

Mananatili ang alaala ni Hajji dahil sa magagandang awitin na kanyang iniwan. Kabilang dito ang greatest hits na 'Kay Ganda ng ating Musika,' 'Nakapagtataka,' 'Panakip Butas,' 'Tag-araw, Tag-ulan' at 'May Minamahal.' 

Nito lamang Pebrero, naiulat na isinugod sa ospital si Hajji at nakikipaglaban sa stage 4 colon cancer na kumalat na sa ibang bahagi ng kanyang katawan. TV Patrol, Martes, 22 Abril 2025