Halos 10 years in the making ang tatag ng pagiging magkarelasyon nina Kim Molina at Jerald Napoles.

Sa teatro unang nagkrus ang landas nila nang maging magkatambal sa musical na "Rak of Aegis."

Kasabay ng pagbaba ng telon sa pagmamahalan nina Aileen at Tolits ang pagbubukas ng puso nila sa isa’t isa.

Gaya ng marami, iniba ng COVID-19 pandemic ang buhay ng dalawa. Sa panahong ito, nag-desisyon silang i-level up ang relasyon at mag-live in.

Doon nahasa ang kanilang galing at abilidad sa buhay para maka-survive.

"Nag-start po kami nung small businesses namin. Pet clothing po siya. Ako po 'yung nagde-design," sabi ni Kim.

Malaking impluwensiya ang kanilang mga pamilya sa kanilang trabaho at sa paggiya ng kanilang personal na buhay.     

Sabi ni Jerald: "Magulang at saka sitwasyon. I think it's the situation that brings me to the decision to 'Hindi Je, wala kang choice, kailangan ‘to sige.” We only have Plan A, there's no Plan B. It's just Plan A."

Matibay ang samahan nina Kim at Jerald, pero para sa kanila, hindi naman kailangan na laging magkasama sila sa bawat proyektong gagawin. 

"Iginalang din namin 'yung sariling brand ng bawat isa. Kasi, si Kim, nakilala naman din as Kim Molina, tapos ako rin naman, on my own. So, sayang din, kasi brand one, brand two, brand three 'yung kami eh," paliwanag ng aktor.

Muli namang nasubukan ang tibay ng kanilang on-screen romance kamakailan sa pelikulang "Seoulmeyt."

Ulat ni Doris Bigornia para sa programang Tao Po. (June 2, 2024)

Mapapanood ang mga episode ng Tao Po dito.