SINGAPORE -  Itatampok sa Singapore ang sayaw at awiting Pinoy sa “A Showcase of Philippine Culture through Music and Dance featuring Parangal." Inorganisa ito ng Embahada ng Pilipinas sa Singapore, Sentro Rizal Singapore, at ng Parangal Dance Company o PDC. 

Ang Parangal Dance Company o PDC

Layon ng event na isulong ang kamalayan at pagpapahalaga sa mayamang kultura ng Pilipinas.

Ayon pa sa embahada, ang PDC ay isang Filipino folk dance and music company na nakabase sa San Francisco, California, USA. Kabilang sa misyon ng grupo ang pagbibigay parangal sa pamanang Pinoy sa pamamagitan ng pagpapanatili at pagsusulong ng mga katutubong kasuotan, musika at mga sayaw ng mga Pilipino.

Layon din ng grupo na magsilbing tulay sa mga Pilipino sa iba-ibang panig ng mundo para ipagmalaki ang kulturang Pinoy.

Suportado ng Asia-Europe Foundation-ASEF at OWWA Singapore ang nasabing folk dance and music event na bahagi rin ng ika-55 anibersaryo ng bilateral relations sa pagitan ng Pilipinas at Singapore.

Ang grupo ng PDC ay mananatili sa Singapore mula July 25-27 para sa kanilang Southeast Asian tour matapos ang kanilang paglahok sa Bojonegoro Thengul International Folklore Festival 2024 sa East Java, Indonesia sa July 20-24.

Inaanyayahan ang mga kababayan sa Singapore na manood ng performance ng Parangal sa darating na July 26, mula 3:00 pm hanggang 5:00 pm na idaraos sa Asia-Europe Foundation, 31 Heng Mui Keng Terrace, Singapore.