PANOORIN: Pahayag ng anak ni Isabel Granada na si Hubert Thomas Jericho Aguas sa pagkawala ng ina @DZMMTeleRadyo pic.twitter.com/0MP9bnGIjX

— Zhander Cayabyab (@zhandercayabyab) November 9, 2017

MANILA -- Kahit nasasaktan, matapang na nagbigay ng pahayag si Hubert Thomas Jericho Aguas, nag-iisang anak ng aktres na si Isabel Granada na pumanaw sa Doha, Qatar noong Nobyembre 4 dahil sa aneurysm sa edad na 41.

Sa pagsalubong sa labi ng kanyang ina sa Ninoy Aquino International Airport nitong Huwebes ng umaga, inamin ni Hubert ang hirap na pinagdaraanan at pagsisisi sa pagkawala ng aktres.

"After those two weeks, knowing that she's gone na talaga, it's very hard to cope. Marami po akong naging regrets kasi medyo malayo nga po. We don't really communicate as much. Tapos I realized that we don't know what's going to happen," ani Hubert.

Sa kabila ng lungkot na nararamdaman, nagbigay pa ng payo si Hubert sa mga katulad niyang anak na pahalagahan ang mga magulang habang may panahon pa.

Aniya, marapat na bigyan ng halaga ang oras na kasama ang mga magulang at palaging maglaan ng panahon para sa kanila.

"Don't take your time with your parents for granted. No matter what happens always be with them kasi they were with you since day one. Always enjoy and save every little moment you have with your parents," ani Hubert.

Sa huli, isang maikli pero puno ng damdamin ang iniwang mensahe ni Hubert sa ina.

"Ma, nandito kami, mahal na mahal ka namin. Marami ka pa lang hindi nakuwento at sana you are happy na rin with God. Just watch over us," ani Hubert.

Ibuburol ang aktres sa Santuario de San Jose Parish sa Greenhills East Village, Mandaluyong.

Sa Linggo, matapos ang isang misa ay nakatakda ang cremation ni Isabel.