Umalis si Daisy Cabantog o mas kilala bilang Madam Inutz sa kanyang talent agency na Star Image Artist Management makalipas lamang ang tatlong araw mula nang pumirma ito ng kontrata.

Sa isang Facebook live video, ipinaliwanag ni Madam Inutz ang kanyang biglaang pag-alis sa nasabing ahensya.

Ani Madam Inutz, umalis siya kasunod nang pagkonsulta niya sa kanyang mga kamag-anak at tagasuporta kaugnay sa kanyang naging desisyon.

“Ito na nga nakita niyo naman si Inutz na pumirma sa Star Image nang biglaan nang hindi kumokonsulta. Mahirap kasi ipaliwanag sa part ko ‘yung mabilisang pangyayari,” ani Madam Inutz.

Dagdag pa nito, lumapit siya sa kanyang abogado kung saan nalaman niya na wala umanong expiration ang kanyang kontrata sa kabila nang kanilang napagkasundang apat na taong deal.

Panoorin ang video sa ibaba:

Gayunpaman, sinigurado ni Madam Inutz sa kanyang mga tagahanga na hindi nito bibitawan ang kanyang pagbebenta ng ukay-ukay.

Ilan lamang sina Buknoy Glamurrr at Xander Ford sa mga kilalang personalidad na naging bahagi ng nasabing management agency.

Samantala, nakilala naman si Madam Inutz sa kanyang mga pagbebenta ng mga damit online na kinaaaliwan hanggang ngayon ng mga netizens.