Medyo weird ang description ni direk Mico Michelena sa kanyang pelikulang Triptiko na pinagbibidahan nina Joseph Marco, Kean Cipriano at Albie Casino. Ang pelikla ay official entry sa Pista ng Pelikulang Pilipino na magsisimula sa August 16 at tatagal hanggang 22.

Pero dahil sa tinamong success ng pelikulang Kita Kita nina Alessandra de Rossi at Empoy Marquez ay nabuhay din siya ng pag-asa na posibleng magustuhan ng moviegoers ang kanyang debut film.

“With the success of Kita Kita, I think what it shows is that yung mga tao are looking for something new.

“Nabuhayan ako dahil puwede eh. Magandang ano siya, precedent siya na merong need and want for new story telling and stories basically,” positibong pananaw ni Direk Mico.

May tatlong istorya ang Triptiko. Ang kay Kean ay may title na ‘Musikerong John.’ ‘Hinog’ naman ang kay Joseph Maro at ‘Suwerte’ ang title ng kay Albie.

“Kaya ko ginawang trilogy dahil I want to offer something more. I could have gone one story pero baka medyo maging limiting, eh. So nung I decided to make it three stories, I think I was able to offer more than don sa usual offerings ng mga filmmakers – kasi nga dahil may variety.

“These are three good stories at yung characters are very relatable. It’s not hard at kahit yung mga masa ma-appreciate nila ito,” paninigurado ng director.

Graded A ng CEB (Cinema Evaluation Board) ang Triptiko na masuwerte ring idi-distribute o ire-release ng Star Cinema.

Ano ang reaksyon na naka-A agad ang first film na sinulat at idinirek niya?

“Speechless. Sobrang… parang, actually this whole ride, eh, since nakapasok ako ng PPP (Pista Ng Pelikulang Pilipino) parang surreal, eh.

“This is my dream, eh, since I was a little boy, as in talagang to make movies and to be able to be appreciated. Kaya I’m so happy and grateful. Ang galing, eh. It’s overwhelming,” reaksyon ni Direk Mico.

Dagdag pa niya, “Nakakatuwa naman na ire-release kami ng Star Cinema. Actually, even before I was talking to them na kasi I gave them my movie.

“Sina Direk Olive (Lamasan) naman, sina Enrico Santos, they’ve been… parang they like the movie, hindi lang nila alam if it’s going to sell.

“Yon yung question na hindi nila masagot so parang they decided not to distribute it originally,” pahayag niya.

Pero nung napili sa PPP ang Triptiko, nabago raw ang ihip ng hangin.

“But then when I got in sa PPP, parang don siguro na validate na, “Ah, meron talaga.” There might be something here kaya rin siguro nila pinili.”

Hindi naman siya halos makapaniwala na ipapalabas ang kanyang pelikula nationwide.

“Dream ko talaga na mag-nationwide release pero I didn’t even know if it was gonna happen. Tapos nagkaroon ng opportunity na ganito sa PPP. Sabi ko nga parang hulog siya ng langit.

“I’m just ecstatic and happy do’n sa opportunity,” sabi pa niya.

Ang Triptiko ay produced ng Michelena Brothers Productions and Barrio’s Pictures. Kasama rin sa pelikula sina Kylie Padilla, Art Acuna at Karl Medina.